Të shtunën, në Korçë, Delegacioni i BE-së përfundoi Javën e tij të Evropës “Udhëtim përmes mrekullive kulturore dhe natyrore të Shqipërisë”. Gjatë shtatë ditëve dhe përmes më shumë se 25 evenimenteve ne eksploruam se si Shqipëria është një pjesë thelbësore e kulturës dhe historisë së pasur të Evropës.

Trashëgimia kulturore: një shans për Shqipërinë

Konferenca e hapur iu dedikua trashëgimisë së pasur kulturore të Shqipërisë dhe potencialit të saj si një nxitëse për rritjen ekonomike dhe krijimin e vendeve të punës. Veprimtaria përfshiu fjalën e hapjes nga Ambasadorja e BE-së Romana Vlahutin dhe Ministrja e Kulturës Mirela Kumbaro, pasuar me prezantime dhe diskutime me përfaqësues të organizatave të shoqërisë civile, bashkisë dhe organizatave ndërkombëtare. Në fund, ceremonia përfundoi me ndarjen e çmimeve për fituesit e konkursit arkitektonik “Bed and Breakfast”, organizuar nga Delegacioni i BE-së.

Promovimi i trashëgimisë kulturore është një shans i madh për komunitetet vendore. Në pazarin e Korçës, ekspertët diskutuan për këto mundësi dhe moderatorja Lejla Hadzic nga “Trashëgimia Kulturore pa Kufi” theksoi se për çdo 800.000 Euro të investuara në rehabilitimin e ndërtesave krijohen 31.3 vende pune, ndërsa e njëjta shumë e investuar në industrinë përpunuese krijon vetëm 21.3 vende pune. Në këtë kontekst, Ambasadorja e BE-së Vlahutin dhe Ministrja Kumbaro ndanë çmimet e një konkursi të Delegacionit të BE-së për arkitektët e rinj që punojnë në objekte turistike që respektojnë arkitekturën tradicionale.